LAOAG CITY – Pimmusayen ti driver ti motorsiklo a naidungpar iti patrol car ti Laoag City Police Station iti Barangay 9 Sta. Angela ditoy siudad ti Laoag.
Basar iti Laoag City Police Station, daytoy ket kalpasan a saan a nakalasat iti sinagabana a nakana a sugat iti nagduduma a paset ti bagi ti driver.
Ti biktima ken ti nangiturong ti motorsiklo a Yamaha Mio ket adda iti umno a tawen ken residente ti Barangay 1 San Lorenzo ditoy siudad ti Laoag idinto a ti kinalubbonna ket agtawen ti 31 ken residente ti Barangay 7-A ditoy siudad nga immun-una a natay.
Ti nangiturong met ti patrol car ket agtawen ti 32 ken ti kaduana ket agtawen ti 28 nga agpada dagitoy a naidesignar iti Philippine National Police ditoy siudad ti Laoag.
Naammoan a ti driver ti motorsiklo ken ti kinalubbonna ket agpada a kameng ti Lesbian, Gay, Bisexual, Transgender Queer wenno LGBTQ.
Maipalagip a kabayatan a dumaldalyasat ti nakamotorsiklo iti Balintawak Street nga agturong nga agpa-abagatan ket kellaat a naidungpar daytoy iti patrol car nga agturong nga agpa-daya a mapan agresponde ti desgrasia iti Gilbert Bridge kadayta a gundaway.
Immuna iti daytoy, naitaray dagiti biktima iti Governor Roque B. Ablan Sr. Memorial Hospital para iti pannakatamingda idinto a saan met a naan-ano dagiti dua a pulis a nakalugan iti patrol car.
