LAOAG CITY – Inbatad ni Ms. Lovely Joy Garcia, Counseling Professional ti Speak Up, I’m Here Mental Health Hotline and Center iti Ilocos Norte Youth Development Office (INYDO), ti kinapateg ti pangipeksa iti marikrikna ti maysa a tao, nangruna no adda dagiti problema wenno emosyon a narigat a maipakita iti sabali a tao.
Segun ken ni Garcia, napateg nga adda ti sabali a tao a pagturongan iti maysa nga indibidual kas emotional support para iti pagsayaatan iti bukod a bagi.
Inlawlawag na a no dagitoy nga emosion ket maurnong ket mabalin a mangitunda iti kellaat a panag-breakdown, pannakarikna iti nakaro a kinabannog, wenno panagliday iti maysa nga indibidual uray pay awan ti nalawag a rason.
Inpetteng na a no agtultuloy ti saan a panangipeksa ken bukbukudan ti maysa a tao dagiti problema ket mabalin a marigatan daytoy a maipaayan ti umno a tulong wenno intervention gapu ta uray ti mismo a tao a makapaspasar ti mental health problem ket saanen a nalawag kenkuana no ania ti namonganayan dagiti marikrikna na.
Gapu iti daytoy, inpaganetget ni Garcia ti kinapateg ti panag-open up ken iyaasideg kadagiti mapagtalkan a tao, wenno panagkiddaw ti tulong kadagiti umiso a mental health professional.












