LAOAG CITY – Agkiddaw ti interbension ti Department of the Interior and Local Government (DILG) manipud iti Supreme Court ken Kongreso tapno papigsaen dagiti panagtignayda kontra kadagiti insidente ti pammaltog kadagiti pagadalan kalpasan ti pasamak iti Banga National High School idiay South Cotabato.
Segun ken ni DILG Secretary Jonvic Remulla, kalikagumna ti pammalubos manipud iti Korte Suprema iti Philippine National Police (PNP) a mangiwayat ti inspeksion kadagiti pagtaengan nga adda iggemna a kwalipikado a paltog tapno masigurado ti umno a pannakailemmeng kadagiti armas.
Inbatad ti sekretario nga iti tallo a nairekord nga insidente ti school shooting ita a tawen, dagiti naaramat a paltog ket kukua dagiti adda iti kameng ti gobierno, isu ti gapuna nga adda ti direkta a panangsungbat dagiti gun owner iti umno a panaangilemmeng kadagiti paltogda.
Mainaig iti daytoy, makibinbinnulig ti DILG iti Department of Justice (DOJ) para iti pannakaipila ti petision iti Korte Suprema, bayat ti panangipanawagan ti agpanpanday linteg tapno maamyendaran dagiti linteg mainaig iti gun ownership ken liability.
Malaksid kadagiti paltog, kalikagum pay ni Remulla a maresolbar ti impluwensiya ti social media ken kadagiti online community kas iti “true crime” groups kadagiti ubbing a posible a rason dagiti araramidenda a kinaranggas.
Kabayatanna, naikeddeng ti panagtaripnong ti DILG iti Department of Information and Communications Technology (DICT) no sadinno ket manamnama ti panagkiddawda ti aksion iti Kongreso para iti naigiget a proteksion kadagiti ubbing iti social media access.
