Inbatad ni Police Capt. Sygman Benigno, ti chief of Police iti ili ti San Nicolas a manarimaan ti imbestigasyon da mainaig iti report nga adda ti maysa a baket a natakawan ti pitaka iti tiendaan iti nasao nga ili.
Inlawlawag ni Benigno a basar iti Close Circuit Television (CCTV) footage ket ado dagiti tattao a nasabat ken sumarsaruno iti baket isut gapuna a marigatan da a mangestablisar no siasinno ti nangkaot ti pitaka manipod iti bag ti biktima.
Maipalagip a nagbalaw laengen ti baket idi saannan a makita ti pitaka na iti uneg ti bagna, a daytoy ket naglaon kadagiti Identification Cards ken kwarta nga agarop 8 ribo a pisos.
Kabayatanna, kuna ni Benigno nga ipadas da ti mangiyuswat ti cross-matching kadagiti immunan a natiliw a nagtakaw iti tiendaan ditoy ciudad ti Laoag iti kallabes a dagitoy ket taga Ilocos Sur tapno maamoan no isuda manen ti adda iti likudan ti pannakatakaw ti pitaka ti baket iti ili ti San Nicolas.
Iti agdama, kuna ni Benigno a mangkitkita da pay ti dadduma a nalawlawag a CCTV footage tapno makita da a nasayaat ti sibubukel a napasamak a mabalin pay a pakaduktalan da no siasinno ti nangkaot ti bag ti biktima.
