LAOAG CITY – Umabot iti 119 a benepisyaryo ti Pantawid Pamilyang Pilipino Program ti nagturposen iti ili ti Vintar.
Binigbig ni Mayor Richard Degala iti ili ti Vintar ti dedikasyon ken kinaundor dagiti nagturpos a benepisyaryo ti programa manipod kadagiti rigat a nagpasaran da iti biag.
Inpasigurado ti mayor nga iti baet a nagturposen dagiti maseknan manipod iti programa ti Department of Social Welfare and Development ket agtultuloy latta ti panangsuporta kadakuada ti gobierno lokal iti ili ti Vintar.
Gagem ti nasao a programa a matulungan dagiti maibilang a nakukurapay tapno mapadur-as ti panagbiag da kangrunaan na iti benneg ti salun-at ken edukasyon.
