LAOAG CITY – Mapatta-patta a 400,000 agingga 500,000 a benepisiario ti adda iti waitlist ti Pantawid Pamilyang Pilipino Program wenno 4Ps ti gobierno, basar iti Department of Social Welfare and Development.
Kuna ni Department of Social Welfare and Development spokesperson Assistant Secretary Irene Dumlao a ti annual a target-da ket adda iti 4.4 million a pagtaengan ngem ti agdama, addaan iti sumurok 2.8 million daytoy.
Maipalagip a pinirmaan ni Presidente Ferdinand Marcos Jr. ti Executive Order No. 120 idi napalabas a bulan a nangipangato ti maximum a 7-year participation period para iti 4Ps beneficiaries.
Inbatadna pay a tinawen a tingtingitingenda dagiti benepisiario a 4Ps tapno maamoan no ana a lebel dagitoy kas iti Level 1 ket survival, Level 2 ket subsistence ken Level 3 ket self-sufficient.
Manarimaan ti panangi-monitorda ti 4Ps beneficiaries usar ti social welfare and development indicators (SWDI), kitkitaenda pay ti social adequacy ken economic sufficiency ken ti improvement ti level of well-being dagiti 4Ps beneficiaries.
Basar iti linteg ken polisia no ti maysa a benepisiario ket ummabot ti Level 3 ket candidate daytoyen para graduation wenno pannaka-exit ti programa ngem inpasuguradona a saan baybay-an ti gobierno daytoy gapu ta adda ti makuna a ‘pugay-tagumpay’ no sadinno ma-turnover ken mabantayan ti local government unit ken masigurado a saanda agsubli ti rigat.
Kabayatanna, inbatadna nga inton rumuar iti programa ti benepisiario ket maaddaan ti slot ken ditoy maserrek iti waitlist.
