LAOAG CITY – Manamnama ti panangipaay ti suporta ti Department of Migrant Workers (DMW) iti dati nga overseas Filipino worker a ni Mary Jane Veloso, pakairamanan ti psychological ken livelihood assistance, kalpasan ti panangipaay ti Malacañang ti absolute pardon kenkuana.
Segun ken ni Palace Press Officer Undersecretary Claire Castro iti maysa a press briefing, paset iti ongoing intervention ti Department of Migrant Workers (DMW) ti panangipaayda ti psychosocial counseling, livelihood starter kits, kapital para iti panagnegosio ken ti skills training.
Kabayatanna, impaima met ti Department of Social Welfare and Development (DSWD) Field Office 3 ti ₱30,000 cash assistance ken ni Veloso, no sadinno nakaala pay dagiti nagannakna ti ₱10,000 bayat a ₱30,000 met ti naipaay para kadagiti annakna.
Maipalagip a sinentensiaan ti District Court of Justice of Sleman idiay Yogyakarta, Indonesia, ni Veloso ti death sentence idi Oktubre 11, 2010.
Mainaig iti daytoy, inpetteng ni Veloso nga inosente daytoy ken awan ti pagaammona a naaramat daytoy a mangipatulod ti iligal a droga.
