LAOAG CITY – Kaunaan a ciudad iti intero a pagilian a Pilipinas ti ciudad ti Laoag a nakabakunan ti HPV iti 96% dagiti ubbing a babbai inga agtawen ti siyam agingga ti sangapulo ket uppat.
Daytoy ket kalpasan ti panangirubuat ti programa a ‘Ligtas sa Cervical Cancer Para sa Bawat Babae at Mag-INa” Vaccination Program ni Presidente Ferdinand Marcos Jr. babaen iti Office of the Presidential Assistant for Northern Luzon Assistant Secretary Ana Remigio, 1st Congressional District Office, Department of Health a nakibinnuligan ti Department of Education-Laoag City, Ilocos Norte Provincial Government, Laoag City Government ken nagduduma pay nga ahensia ti gobierno ken grupo.
Segun kenni Dr. Rodrigo Catcatan, mangidadaulo ti City Health Office, daytoy ti maysa nga ar-arapaenda a magutigot dagiti ubbing pakairamanan dagiti inna dagitoy nga agbakuna kontra iti HPV.
Nagyaman ni Dr. Catcatan kenni Mayor James Bryan Alcid kenni Presidente Marcos, ASec Remigio, Congressman Sandro Marcos, Department of Health ken dagiti amine a timmulong iti pannakaiwayat ti naindaklan nga aktibidad.
Inayonna a dakkel a tulong iti salun-at dagiti babbai ti pannakabakuna da kontra iti cervical cancer.
Kabayatanna, kunana a dakkel a tulong ti pannakalibre gapu ta umab-abot itan ti 6,000 pesos ti panagpabakuna ti anti-cervical cancer.
