LAOAG CITY – Nagballigi dagiti kameng ti Philippine National Police iti insayangkat da nga anti-illegal drug buy-bust operation iti ili ti Badoc.
Segun ken ni Police Capt. Ellison Pasamonte, ti chief of police iti ili ti Badoc, ti subject ti operasyon ket agtawen ti 41, construction worker, residente iti Barangay 2, Garreta iti ili ti Badoc ken maibilang kas High Value Individual.
Inbatad ni Pasamonte nga immuna a natiliw ti suspek idi 2022 ngem nakaruwar metlaeng iti pagbaludan.
Nupay kasta, kuna ni Pasamonte a san a makaipaay ti naan-anay a detalye seknan iti immuna a kaso ti suspek gapu ta sabali nga ahensya ti nakatiliw idi kenkuana.
Mainaig iti daytoy, inpakaammo ni Pasamonte a kadagiti naglabas a bolan ket rimuar manen ti nagan ti suspek babaen kadagiti impormasyon a maaw-awat da manipod kadagiti informant ken informer maipanggep iti illegal nga aktibidad ti maseknan isut gapuna nga insayangkatan da ti operasyon.
Inbatad na a nakakumpiskar da ti innem a sachet a naglaon ti maipagarop a shabu nga agdagsen ti sumuruk-kumurang a dua a gramo.
Innayon na a nalawa ti sakupen ti operasyon ti suspek gapu ta basar iti impormasyon da ket makadandanun pay daytoy kadagiti kabangibang da nga ili ken uray kadagiti ciudad ditoy probinsya.
Kabayatanna, inpasigurado ni Pasamonte nga iti agdama ket saanen a kas kadagiti naglabas a tawen ti sitwasyon ti ili ti Badoc no maipapan iti illegal a droga.
