LAOAG CITY – Nakasaganan dagiti contractor nga agasawa a da Sarah ken Curlee Discaya a manginagan kadagiti opisyal manipod iti naglabas nga administrasyon a maipagarop nga adda ti pakainaigan da kadagiti maanomalya a flood control projects.
Daytoy ti inbatad ti abogado dagiti agasawa a Discaya a ni Atty. Cornelio Samaniego III.
Segun ken ni Samaniego, ti laeng nasakupan dagiti proyekto dagiti agasawa a Discaya ket manipod Hulyo 2022 agpangato, basar iti affidavit gapu ta daytoy ti timeframe a kiniddaw ti senado.
Maipalagip a nagatendar dagiti agasawa a Discaya iti panagdengngeg iti senado ken kamara de representantes kadagiti naglabas nga aldaw no sadinno nga ado dagiti dinakamat da a nagan a maipagarop nga adda ti pakainaigan na iti maanomalya a flood control projects.
Idi laeng martes, inbutaktak ni Curlee iti House hearing nga adda dagiti opisyal kabayatan ti administrasyon ni dati a President Rodrigo Duterte a nagkiddaw ti komisyon wenno payoffs kasukat ti flood control contracts ngem nagkedked nanginagan kadagiti maseknan.
