LAOAG CITY – Inarestar ti Philippine Drug Enforcement Agency Regional Office 9 (PDEA RO9) dagiti dua a suspek iti iligal a droga babaen ti panagbibinnulig ti Philippine National Police Zamboanga del Sur Provincial Intelligence Team (ZDSPIT), Coast Guard Intelligence Unit–Zamboanga del Sur, 90th Maneuver Company ti Regional Mobile Force Battalion 9, Naval Intelligence and Security Group Western Mindanao ken ti Philippine National Police Maritime.

Nakumpiskar manipud kadagitoy ti sumurok kumurang 350 a gramo ti mapapati a shabu iti F.S. Fajares Avenue, Barangay San Jose, Pagadian City.

Dagiti naarestar a suspek ket nabigbig a da alyas “Abdul,” agtawen 34, maysa a drayber ken ni  “Sabdani,” agtawen 36, no sadinno agpada dagitoy a residente ti Barangay Kawit, Pagadian City.

Basar iti PDEA iti nasao nga operasion, nakumpiskar manipud kadagiti suspek ti pito (7) a heat-sealed plastic sachet a naglaon ti mapapati a shabu, no sadinno agdagup daytoy ti P2.38 million.

Nakumpiskar pay manipud kadagiti suspek dagiti dua a lugan, cellphone, paper bag, maysa nga eco bag ken ti kuarta a nausar iti buy-bust operation. Kabayatanna, dagiti naarestar a suspek ket manamnama a sumango iti kaso a panaglabsing iti Section 5, Article II ti Republic Act No. 9165 wenno ti Comprehensive Dangerous Drugs Act of 2002.