LAOAG CITY – Inpila ita nga aldaw ni Atty. Ernest Levanza, legal counsel ni dati a Department of Public Works and Highways (DPWH) engineer Brice Hernandez ti petisyon a ‘writ of amparo’ iti maysa a korte idiay Pasay kalpasan ti pannakaiyakar na iti city jail iti nasao a ciudad.
Segun kenni Levanza, ti petisyon nga inpila na iti Branch 12 ti Pasay Regional Trial Court ket tapno kiddawen ti ‘temporary protection order’ ken maipan ti kliyente na iti witness protection program.
Inpetteng na a saan nga akusado wenno nakumbiktaran iti aniaman a kaso ni Hernandez isut gapo na a kweskwestyunaran da ti pannakaipan ni Hernandez iti Pasay City Jail.
Kuna pay ni Atty. Levanza a ni Brice Hernandez ket nakaawat kadagiti pangta kalpasan ti rebelasyon na iti House of Representatives.
Innayon na a kimmaro pay daytoy kalpasan ti panangiraman ken pananginagan na kadagiti sumagmamano a senado a maipagarop a karaman iti anomalya iti flood control projects.
