LAOAG CITY -Naipasa ti maikadua ken maudi a pannakaibasana ti resolusion para iti pannakaiyendorsar ti plano ti Department of Public Works and Highways (DPWH) a tourist center kadagiti nagduduma a paset ti ili ti Paoay.
Daytoy ket proyekto ti Department of Public Works and Highways (DPWH) a pakibinnuligan ti probinsia ti Ilocos Norte.
Segun ken ni Mr. Aian Ree Raquel, ti mangidadaulo ti Provincial Tourism Office ditoy probinsia, ti tourist center ket maipatakder iti paset ti Suba, Sand Dunes, Onse Reef, ken Culili Point iti ili ti Paoay nga addaan ti kalawa a 725 nga ektaria.
Mainaig iti daytoy, kunana a ti pondo ket manipod ti Department of Public Works and Highways (DPWH) nga agdagop ti P18 million.
Innayon ni Raquel a ti addang ket maysa a katulagan ti Department of Environment and Natural Resources (DENR) ken ti Provincial Government of Ilocos Norte (PGIN), babaen ti memorandum of agreement a napirmaan idi administrasion ni dati a Governor Ferdinand Marcos Jr.
Kabayatanna, inpanamnama ni Raquel nga addan to pay dagiti maipatakder a tourist center kadagiti kabangibang nga ili iti masangwanan tapno ad-adda pay a mapapintas ken mapadur-as ti turismo ditoy probinsia.












