LAOAG CITY – Naglippasen ti kampania ni Pinay tennis star Alex Eala iti SP Open idiay Brazil.
Daytoy ket kalpasan nga inabak isuna ni Janice Tjen ti Indonesia 6-4, 6-1 iti quarterfinals ti nasao a torneo.
Ti nasao a pannakaabak ket isu ti nangipasardeng ti pito a nagsasaruno a panagballigi ni Eala sipod idi nagun-odna ti kampeonato iti Guadallajara 125 Open iti napalabas a lawas.
Iti umuna a set ket dominado ni Eala ti ay-ayam iti 3-0 agingga idi makasubbot ti Indonesian player ket ditoy nga immarangkada.
Iti panagserrek ti second set ket naalana ti panagballigi iti umuna nga ay-ayam ngem nagtalinaed a natibker ni Tjen tapno makastrek iti semifinals.
Sumaruno a pakipagpasetan ti ranked 61 a ni Eala ti Jingshan Open idiay China a maiyuswat manipud inton Septiembre 22 agingga iti 28.
