LAOAG CITY – Nagballaag ni Kim Yo Jong, kabsat ni North Korean leader Kim Jong Un, a mabalin a mangitunda ti ”negative consequences” ti isaysayangkat a joint military exercises ti Estados Unidos, South Korea, ken Japan.
Mangrugi ita nga aldaw, Setyembre 15 ti tinawen a military drills ti tallo a pagilian no sadinno nga inawagan daytoy a ”Freedom Eadge,” a gagem na a papigsaen ti air, naval, ken cyber defense capabilities ti Amerika, South Korea, ken Japan.
Segun ken ni Kim, ti panangipakita ti presensya ti Amerika., Japan, ken South Korea iti saan nga usto a lugar, iti lawlaw ti North Korea ket sigurado a maaddaan ti dakes nga epekto kadakuada.
Malaksid iti daytoy, namnamaen a mangiyuswat pay ti South Korea ken Estados Unidos ti “Iron Mace” tabletop exercises iti sumaruno a lawas no sadinno a mapagsasaritaan ti integration ti conventional ken nuclear capabilities kontra kadagiti pangta ti Pyongyang.
Kabayatanna, nagballaag pay ni Pak Jong Chon, maysa a nangato nga opisyal ti North Korean ruling party, a no itultuloy dagiti “hostile forces” dagiti military drills ket mangipakita ti North Korea ti nalawlawag ken naiget a sungbat kontra kadagitoy.
Maipalagip a nabayagen a konkondinaren ti North Korea dagiti nasao a panagsanay nga ibilang da a rehearsal para iti panagsagsagana ti gubat idinto nga inpetteng ti Seoul ken Washington a ti ar-aramiden da a drill maysa laeng a defense capabilities.
