LAOAG CITY – Inpruk-aten ti International Criminal Court (ICC) Office of the Prosecutor dagiti detalye ti kaso kontra kenni dati a Presidente Rodrigo Duterte.
Nakailanad iti nasao a dokumento nga inpila ti Office of the Prosecutors dagiti krimen nga usaren ti Pre-Trial Chamber.
Ti Document Containing of the Charges (DCC) ket su ti pagibasaran para met iti confirmation of charges hearing.
Basar iti dokumento, pagsungsungbaten dagiti prosecutors ti dati a presidente kadagiti kaso kas iti:
Murder kas crime against humanity idiay Davao City idi nagserbi kas ayor iti nagbaetan ti 2013 agingga ti 2016 no sadinno nailanad iti dokumento a dagiti biktima ket maipagarop a kriminal kas iti drug pushers.
Murder kas crime against humanity kontra kadagiti “high value targets” kadagiti nagduduma a lugar iti Pilipinas idi presidente manipud 2016 agingga iti 2017.
Murder ken attempted murder kas crimes against humanity iti barangay clearance operations iti nagduduma a lugar iti pagilyan idi presidente manipud 2016 agingga iti 2018.
Segun iti prosecutors, ti 49 nga insidente a mangsupsuporta iti kaso nga addaan ti 78 a biktima – 19 biktima iti count 1; 14 a biktima iti count 2 ken 45 a biktima met iti count 3.
Makita pay iti dokumento a ni Duterte ti adda iti likodan dagiti kaso gapo iti panangilatang ti pondo ken panagmandar kadagiti tattao tapno maipatungpal ti ‘war on drugs’ na.
Kageddan iti daytoy ket inparuk-at ti prosecution ti “Pre-Confirmation Brief” para iti mas detalyado a palawag ti prosecutions kadagiti ebidensya ken argumento a mangsupsuporta kadagiti kaso kontra kenni Duterte. Maipalagip nga ita kuma nga aldaw, Setyembre 23 ti confirmation of charges hearing ti dati a presidente ngem inbatad ti defense team nga adda ti isyu iti salun-at iti dati a presidente kas iti saan na a pannakalagip kadagiti paspasamak nga arig na ket agkabaw.
