LAOAG CITY – Inlawlawag ti Philippine Institute of Volcanology and Seismology (Phivolcs) a saan a konektado ti magnitude 6.9 a gingined idiay Cebu ken ti panagalburuto ti bulkan Taal.
Inlawlawag ni Phivolcs Director Dr. Teresito Bacolcol a no dadduma ket adda ti aktibidad wenno panagalburuto ti bulkan.
Inbatad na nga iti agdama ket nasurok 90 phreatic ken phreatomagnetic eruptions ti nairekord sipud idi Abril iti napalabas a tawen.
Iti agdama ket nagtalinaed ti Taal iti Alert Level 1 a kayat na a sawen ket abnormal pay laeng ti kondisyon na nga addaan ti nababa a lebel iti volcanic unrest.
Mainaig iti daytoy, pinalagipan na ti publiko nga agtalinaed nga alerto gapo iti posible a kellaat a panagbettak, volcanic earthquakes, ashfall ken panagipugso na ti gas.
Ummuna iti daytoy, timmaa ti napigsa a gingined iti Cebu iti oras 9:59 ti rabii idinto a ti minor phreatomagmatic eruption iti bulkan Taal ket itay alas-2 ti parbangon ti Miyerkules.
