LAOAG CITY – Maiyalokar ti 2,179,730 a milyon a pisos para ti motor vehicle iti Piddig District Hospital.
Babaen iti maysa a resolusyon ket maireprogram ti nasao a gatad manipod iti Capital outlay ti Continuing Appopriation iti Calendar Year 2017-2021 tapno maiyalokaran daytoy ti pondo.
Iti sponsorship speech ni Sang. Panlalawigan Member Rafael Medina, kiniddaw ni Dr. Sherylle Laguatan, OIC iti nasao nga ospital ,ti pannakaireprogram ti nagduduma a capital outlay iti continuing approriation kadagiti nadakamat a tawen.
Mainaig iti daytoy, inbinsa-binsa ni Medina ti naggapoan dagiti pondo kas iti 250,000 pesos iti Calendar Year 2017 ken 350,000 pesos iti tawen 2019 a dati a naiyalokar iti Hospital and Health Centers.
Ti met 282,935 pesos ket manipud iti pondo ti Office Equipment iti tawen 2019 kasta met iti 816,128 pesos iti tawe 2020.
Iti tawen 2020 met laeng partikular iti Machinery and Equipment ti pangalaan da iti pondo a 55,650; idinto a ti 290,000 pesos a naiyalokar iti tawen 2020 ken 135,000 pesos iti tawen 2021 manipud iti Information Technology Equipment.
Inlawlawagna a ti nasao a lugan ket maysa a 4×2 pick-up automatic a mausar para ti napinpintas pay a serbisyo ti ospital.
Mainaig iti daytoy, sangsangkamaysa nga inaprobaran dagiti presente a miembro ti Sang. Panlalawigan ti nasao a resolusyon.
