LAOAG CITY – Sumango iti ethics complaint ni Senator Francis ‘Chiz Escudero gapo iti panangawat na iti donasyon manipud iti kontraktor a karaman iti anomalya a flood control project.
Kinumpirmaran daytoy ni Sen. JV Ejercito, chairman ti Committee on Ethics and Privileges iti Senado no sadinno trataren daytoy dagiti miembro ti komite.
Inbatadna nga aktibo met ti Independent Commission for Infrastructure nga ipursige ti kaso kontra kenni Escudero.
Maipalagip nga inadmitir ni Escudero nga immawat ti donasyon idi 2022 election manipud iti pagayam na a kontractor ti flood control project ti gobierno.
Ummuna metten nga inbatad ni Lawrence Lubiano, ti presidente ti Centerways Construction and Development, Inc. kabayatan ti congressional inquiry a ti donasyon kety manipud iti personal na a kwarta ken saan a naggapo iti kompanya.
Kunana pay nga inpan met ni Escudero ti donasyon ken nagan na kas campaign donor iti statement of contributions and expenditures ti senador.
Iti babaen ti Omnibus Election Code, dagiti addaan ti kontrata iti gobierno ket maipawil a mangipaay ti kontribusyon iti partisan political activity.
Kabayatanna, kuna ni Escudero a saanen a nakigtot iti pannakaipila ti reklamo gapo ta daytoy ti resulta iti inbutaktak na kontra kenni dati nga Speaker Martin Romualdez kabayatan ti manifestation na iti Senate plenary.
Innayon na a reklamo ket paset iti aw-awagan na nga “script” ken desperate cover-up.
