LAOAG CITY – Inbatad ni Department of Justice Sec. Jesus Crispin Remulla a manarimaan ti panangimbestigar da kadagiti opisyal ti gobierno manipud 2016 agingga iti 2025 mainaig iti anomalya a flood control projects.
Segun kenni Remulla, daytoy ti ummunan a dinakamat na nga adda ti 200 nga indibidual a maipagarop a karaman iti kontrobersyal nga infrastructure projects.
Karaman iti nasao a bilang dagiti district engineers kasta met dagiti contractors a nakaala iti proyekto ken uray dagiti 67 a kongresista a contractor wenno aw-awagan da a cong-tractors.
Inlawlawag na a saanen a baro ti kastoy a mapaspasamak iti House of Representatives wenno kadagiti kongresista.
Aminado met daytoy a sumagmamano kadagiti miembro iti kongreso ket contractor pay isut gapo na a nadakamat na ti termino a ‘cong-tractors’.
Kabayatanna, kunana a nakikoordenar metten kenni House Speaker Bojie Dy tapno mapagsaritaan daytoy banag.
