LAOAG CITY – Naitabonen ti bangkay ti walo a biktima ti maipagarup nga extra judicial killings iti war on drugs ti Duterte administration idiay Caloocan City ita nga aldaw ti Sabado, Oktubre 4.
Naiyuswat ti inurnment ceremony iti Dambana ng Paghilom iti La Loma Catholic Cemetery iti nasao a siudad.
Inatendaran daytoy dagiti miembro ti pamilia dagiti biktima pakairamanan dagiti pannakabagi ti Buhay ti People Power Campaign Network ken 2025 Ramon Magsasaysay Awardee a ni Fr. Flavie Villanueva.
Iti nasao nga event, inrakurak ni Kiko Aquino Dee, ti co-convenor ti Buhay ang People Power Campaign Network, nga adda ti nalawlawag a pannakaawat ti publiko iti kinadagsen ti kaso, ita a naduktalanen ti International Criminal Court (ICC) ti tallo a bilang ti panangpapatay para iti 43 a biktima ti drug war.
Inlawlawagna nga iti baet nga adda ti panagamak iti pannakaitantan ti proceedings kontra iti dati a Presidente, kunana nga umas-asidegen ti pannakagun-od ti hustisia ken mangnamnama nga agtultuloy ti panagdengngeg iti confirmation of charges kontra iti dati a Presidente.
Ti nasao a seremonia ti mangipasimudaag ti panaglippas ti “Justice for All Campaign” a nairubuat tapno ipanawagan ti panagsungbat para iti extra judicial killings.
Nangrugi ti nasao a kampania idi Agosto 17 kagiddan ti maika-walo nga anibersario ti pannakatay ni Kian delos Santos, maysa a biktima ti extra judicial killings iti babaen ti drug war a nakatayan ti sumurok innem a ribu a drug suspects iti kangitingitan ti police operations ngem basar iti human rights organizations, posible a dumanon iti 30 a ribu ti bilang dagiti napapatay gapu kadagiti unreported incidents.
