LAOAG CITY – Nabirukan ti agtatapaw a bangkay ti lalaki iti Padsan River a paset ti Barangay 33-B, Lapaz ditoy ciudad ti Laoag.
Nabigbig ti biktima a ni Mario Sahagun, agtawen ti 45, awanan ti asawa ken residente iti Brgy. Sagpatan iti ili ti Dingras.
Ni Sahagun ket immunan a naireport a mapukpukaw nga iti Brgy. Sagpatan iti ili ti Dingras a naudi a nakita idi rabii ti Oktubre 2 ita a tawen.
Mainaig iti daytoy, inbatad ti maysa a mangngalap a ni Mr. Samuel Borja a kabayatan ti panagsagsagana na nga agsigay ket binaon dagiti kabarangayan na a mapan na kitaen no tao ti nakita da nga agtatapaw iti karayan.
Kuna na nga iti panagturong na iti lugar ket nakumpirmaran na a bangkay ti tao ti agtatapaw ken nakapakleb daytoy isut gapuna nga inpakaammo na a dagus iti maysa a konsehal da.
Kabayatanna, inyistorya met ti dati karruba ti biktima a ni Mrs. Leticia Antonio nga idi rabii ti Oktubre 2 ket napan nakiminatay ni Sahagun iti sentro ti ili ti Dingras ken nagawid daytoy iti oras ti alas-onse ngem saanen a nakita ken nakasangpet iti balay da sipud iti dayta a gundaway.
Innayon ni Antonio a naamoan da a nabartek ni Sahagun iti panaggapo na iti nakiminatayan na ken adda ti ballasiwen na a karayan.
Kuna pay ni Antonio a ti immuna a nagilasinan da a ti Sahagun ti bangkay ket ti aritos na.
