LAOAG CITY – Inlawlawag ni Independent Commission for Infrastructure Spokesperson Brian Keith Hosaka a pagbalbalinenda a pribado dagiti panagdengngeg ti komision tapno maliklikan a ma-mislead ti publiko kadagiti testimonia dagiti indibidual a maim-imbestigaran.
Inpettengna a sensitibo dagiti isyu a mataltalantan isu a masapul a siguradoen nga umuna no husto ken kumpleto dagiti amin nga impormasion sakbay daytoy a maipublikar.
Gagem ti komision a mapagtalinaed ti kredibilidad ti imbestigasion ken maliklikan ti panagatap a mabalin a makadadael iti reputasion dagiti karaman agingga a saan pay a nalpas ti proseso.
Kabayatanna, nakitaripnong ita nga aldaw ni Independent Commission for Infrastructure Special Adviser Gen. Rodolfo Azurin Jr. kadagiti miembro ti komision.
Manamnama a kaduaenna ti grupo kadagiti sumarsaruno nga imbestigasion kalpasan ti panagsapatana para iti baro a posision.
