LAOAG CITY – Inpasigurado ni Presidential Communications Office (PCO) Secretary Dave Gomez a determinado ni Presidente Ferdinand R. Marcos Jr. a pagsungbaten dagiti kurakot nga opisyal ken lippasen ti kultura ti korapsyon iti gobierno.
Segun kenni Gomez, ikarkarigatan ti administrasyon a maisubli ti panagtalek ti publiko ken dagiti agpupuunan babaen iti transparency ken dagiti reporma.
Inbatad na pay a sigsiguradwen ni Pres. Marcos nga agsungbat iti siasinno man a karaman iti iregularidad ken madi a pannakausar ti pondo ti gobierno.
Dinakamat pay ni Gomez ti pannakaestablisar ti Independent Commission for Infrastructure (ICI) a gagem na a mangiyuswat ti imbestigasyon ken mangirekomendar ti kaso kontra kadagiti responsable.
Patien met ni Gomez a makatulong ti natibker a kalikagom ti gobierno kontra iti kurapsyon ken ti panagbalbaliw iti institusyonal tapno mapagtalinaed ti talek dagiti agpuunan ken para iti ekonomiya.
