LAOAG CITY – Nagsapata ni Col. Michael Randrianirina kas baro a Presidente idiay Madagascar sumagmamano nga aldaw kalpasan ti panangala ti militar iti Indian Ocean nation.
Sinukatanna ni Presidente Andry Rajoelina a nagtalaw iti pagilian ken na-impeach kalpasan ti adu a lawas dagiti tignay protesta nga indauluan dagiti agtutubo a mangikalikagum ti dakdakkel a panagsungbat manipud iti gobiernona.
Naisayangkat ti seremonia iti Constitutional Court iti Antananarivo a naguummong dagiti naruay a tattao pakairamanan dagiti nangidaulo iti tignay protesta.
Mainaig iti daytoy, ni Col. Randrianirina ti mangidadaulo ti Madagascar’s elite CAPSAT army unit a nakipaset ti tropana kadagiti rinibu a nagprotesta kadagiti kalsada ti kabisera.
Inbatadna kadagiti demonstrador ti Gen Z nga isu ti mangala iti turay ken mangbukel ti militar iti gobierno ken mangiwayat iti eleksion iti uneg ti dua a tawen.
Mangnamnama a maitandudo ti demokrasia, agpadpada iti uneg ken ruar ti pagilian a matungpal daytoy a kari.
