LAOAG CITY – Inpakammo ni Dr. Loida Valenzuela, provincial veterinarian a manarimaan iti surveillance ti bird flu ditoy probinsia a nangrugi pay idi Oktubre 7.
Segun kenni Valenzuela, kalikagom da a makaala ti 90 a sample iti kada ili manipud kadagiti tallo a mapili a barangay.
Ti nasao a surveillance ket panangsurot iti mandar ti Department of Agriculture ditoy Rehion Uno.
Kuna ni Valenzuela a wagas daytoy ti Provincial Veterinary Office tapno masigurado nga awan ti agwarwaras a bird flu ditoy probinsia ken mapagtalinaed a bird flu-free ti Ilocos Norte.
Ummunan nga adda ti naisayangkat a blood sampling kadagiti nagduduma a lugar ditoy probinsia tapno masigurado a natalged dagiti taraken a manok, pato ken dadduma pay.
Maipalagip a nagwaras ti virus kalpasan nga adda dagiti inbunong ti Department of Agriculture a manok nga isu ti mapapati a nangrugyan ti bird flu.
Inadmitir ni Valenzuela a narigatan da a nangkontrol iti daytoy ngem babaen met laeng iti panagtitinnulong dagiti maseknan nga ahensia ket naideklara a bird flu-free ti probinsia.
Kabayatanna, no maipanggep met kadagiti migratory birds ket agtultuloy monitoring ti Provincial Veterinary Office gapo ta adda ti ruta a sursuruten da a mabalin a carrier iti nasao a virus.
