LAOAG CITY – Napilaan ita nga aldaw, Oktubre 20 ni dati nga Ilocos Sur Governor Chavit Singson ti sumagmamano a reklamo mainaig iti isyu ti korapsyon iti lugar nga indaulwan na iti sumagmamano a tawen.
Personal nga inpila ti abogado a ni Atty. Estelita D. Cordero, lider ti grupo a Warriors Ti Narvacan, ti reklamo a plunder iti Office of the Ombudsman kontra iti dati a mayor, kadwa na ti Vice Mayor na a ni Pablito Sanidad Sr. ken dadduma pay.
Basar iti reklamo, maipagarop nga adda ti napasamak a panagkukunsabo iti panaglako wenno panaggatang ti munisipalidad ti Narvacan iti maysa a data iti lugar da.
Mamati ti grupo a dagiti pinilaan da ti reklamo ket adda ti panagkukunsabo da iti panaggatang ti agarop 99,000 square meters a daga iti balor a nasurok a P140-million a no ikumpara da ti zonal value ket adda laeng ti 49-milyon a pisos.
Mainaig iti daytoy, nagtalinaed ti takder ti grupo a mailabsing daytoy iti Republic Act No. 7080 ti Plunder Law gapu ta nagatang nga overpriced ken maibilang a nakurang a 100-milyon a pisos nga ill-gotten wealth.
Malaksid iti daytoy, nagpila met ti complainant a ni Atty. Estelita D. Cordero ti reklamo a panaglabsing ti Anti-Graft and Corrupt Practices Act wenno ti Republic Act No. 3019 kontra ken ni dati a Narvacan Mayor Chavit Singson.
Ti met alegasyon da iti graft complaint ket ti ilegal a panangokupar ken pannakapagbalin a pribado ti maysa a paset ti kabaybayan iti Sulvec, Narvacan, Ilocos Sur nga iti saan a nagbayag ket nabigbig kas ‘Santorini’.
Ditoy nga inpetteng da a maipagarop nga awan ti permit iti panagpaaramid ti nasao a resort ken napaaya a nakaala ti environmental clearance.
Gapu iti daytoy, nakiddaw iti naipila a reklamo ti pannakapukaw ti bileg iti napasamak nga illegal a panaglako karaman ti demolisyon iti nasao nga istraktura.
Nakiddaw pay ti pannakaiwayat ti lifestyle check para iti dati nga opisyal ti Narvacan.
