LAOAG CITY – Napilaanen ti suspek iti pammaltog a nakatayan ti ag-live-in partner iti Barangay 21 iti ili ti San Nicolas iti kaso a double murder ken frustrated murder.
Nabigbig dagiti biktima nga isuda Barangay Kagawad Joshua Madamba, agtawen ti 27 ken ti live-in partner-na a ni Eloisa Jane Pagadoan Bonilla, agtawen ti 30 ken maysa nga Online Accounting Staff.
Nabigbig met ti suspek a maysa a kameng ti Philippine National Police, naasawaan, taga ili ti Badoc ngem agdama a naka-assign iti Ilocos Norte Police Provincial Office ken addaan ti ranggo a Police Corporal.
Manamnama ti pannakaisayangkat ti press conference inton bigat iti panangidaulo ni P/Col. Joemar Labiano, Provincial Director ti Ilocos Norte Police Provincial Office ken maimbitaran pay ni P/Capt. Sygman Benigno, Hepe ti San Nicolas Municipal Police Station.
Nagturong a mismo ni P/Col. Labiano iti pagtaengan dagiti ag-live-in partner a napaltu-paltogan a nangitunda ti pannakatayda.
Naiget a kondenaren ti Ilocos Norte Police Provincial Office ti napasamak a pammaltog nangruna ket ti karaman iti daytoy ket kameng ti nailian a pulisia.
Maipalagip a nai-report a ti suspek ket dati nga agayan-ayat ken ti maitudtudo a motibo ket imon ken love triangle.
Immuna iti daytoy, nakakumpiskar dagiti kameng ti Scene of the Crime Operatives iti nakapasamakan ti krimen ti walo nga empty fired cartridges ken dua nga slugs no sadinno a rumrummuar a nausar a paltog ket calibre 45.
