LAOAG CITY – Inriing ni Konsehal Jayson Perera iti nasapa pannakaiddep ti silaw dagiti sumagmamano a solar street lights ditoy ciudad ti Laoag, kangrunaan iti nagbaetan ti Ablan avenue ken Panganiban street.
Segun ken ni Perera, naobserbar na daytoy iti idadalan na iti lugar iti oras ti alas-diyes ti rabii.
Inbatad na nga immunan a naidasar daytoy a banag, addan pito a bolan ti napalabas ngem agpapan ita ket awan pay ti nagbalin nga addang ti City Engineering Office.
Kunana a kasapolan a mangted ti City Engineering Office iti kopya iti kontrata tapno makita no dagitoy ket adda paylaeng iti warranty-na.
Nupay kasta, mamati ni Perera nga adda paylaeng ti warranty na dagiti solar street lights gapu ta mano a bulan paylaeng sipud idi nainstolar dagitoy.
Innayon na a narigat ti agkiddaw ti dokumento kadagiti implementing agencies idinto a kasapolan a mangipaay da tapno masolusyonan dagiti reklamo.
