LAOAG CITY – Kinumpirmaran ti Director ti Department of Public Works and Highways wenno DPWH-Bureau of Research and Standards (DPWH-BRS) a dati a nag-opisina ti dati nga asawa ni Bulacan First District Engineer Brice Hernandez iti pasdek a nauram.
Inbatad ni Department of Public Works and Highways – Bureau of Research and Standards Director Juliana Vergara, iti maikatlo a kadsaaran ti pasdek no sadinno a nangrugi ti uram ket nag-opisina ti dati nga asawa ni Brice.
Nupay kasta, ita a tawen ket nag-resign ti nasao nga empleado a saanen nga innaganan ni Vergara.
Saan metten a nangipaay ti nayon nga impormasion ni Vergara no apay a nag-resign ti dati nga asawa ni Brice.
Kabayatanna, inlawlawag ti maysa nga opisial ti Department of Public Works and Highways nga awan ti napapateg a dokumento mainaig iti flood control projects ti nadadael kalpasan ti uram iti nasao a pasdek idiay Kamuning, Quezon City.
Kagiddan daytoy dagiti agwarwaras a nairanta ti pannakauram ti nasao a pasdek tapno mapukaw dagiti ebidensia ti nabara nga isyu iti flood control projects.
Iti agdama, agtultuloy ti maiwaywayat nga imbestigasion ti Bureau of Fire Protection (BFP) no ania ti namunganayan ti uram ken no mano ti balor ti pannakadadael ti pasdek ken dagiti kagamitan daytoy.
