LAOAG CITY – Kinumpirmaran ni Dr. Arlene Ragasa, officer-in-charge ti Gov. Roque Ablan Senior Memorial Hospital nga agkurkurang ti nurse ken trauma doctor da.

Segun kenni Ragasa, kasapulan da pay ti 16 a nurse tapno napinpintas pay ti serbisyo nga ipaay da kadagi pasyente.

Inbatad na a daytoy ti rason no apay nga agirefer da kadagiti emergency cases iti Mariano Marcos Memorial Hospital and Medical Center iti ciudad ti Batac.

Kabayatanna, nagyaman met ni Ragasa iti nasao nga ospital iti Batac iti dagus a panangawat na kadagiti referrals da gapo iti panagkurkurang ti trauma doctors.

Innayon na a silulukat da kadagiti aplikante nga agserbi iti ospital ken ti tulong ti gobierno probinsyal.