LAOAG CITY – Immapela ti Department of Social Welfare and Development iti publiko a respetaren ken masapol nga agbalin a sensitibo dagitoy iti panag-share iti online mainaig iti family food packs ken relief aid a mait-ited kadagiti naapektaran ti kalamidad.
Daytoy ket kalpasan nga adda ti netizen manipud Davao Oriental ti nagangaw nga ilako na ti relief items a naawat na manipud iti Department of Social Welfare and Development gapo iti napasamak a gingined.
Iti maysa nga statement, ginutigot ni Department of Social Welfare and Development spokesperson and Assistant Secretary Irene ti publiko a saan nga agaramid wenno agshare social media kadagiti posts a paggaangawan a mangitunda iti pannakatikaw dagiti tattao mainaig iti humanitarian assistance operations ti ahensya.
Ibilang ni Dumalo a misleading contents dagitoy nga arig na mangbalbalewala iti disaster response efforts ti gobierno ken dagiti dadduma nga humanitarian organizations.
Maipalagip a nagpost ti maysa nga indibidual iti Banaybanay, Davao Oriental no sadinno makita ti innem a karton ti family food packs manipud iti Department of Social Welfare and Development ken inyangaw na a dagitoy ket mailaklako.
Mainaig iti daytoy, inbatad ti ahensya a nagpadespensar met laeng ti indibidual ken inikkat na ti post na.
Nupay kasta, inlawlawag ni Dumlao a ti panangiwaras iti palsonga impormasyon mainaig iti relief aid ket saan a panangrespeto iti dignidad dagiti biktima ti kalamidad ken dadduma pay a benepisyaryo iti aid program ti Department of Social Welfare and Development.
Kunana a ti kastoy a palso nga impormasyon ket lapped iti efficient delivery iti ayuda kadagiti agkasapulan.
Innayon na a nasken a saan nga ang-angawen dagiti family food packs ken relief items gapo ta mabalin a mangitunda iti distress and confusion kadagiti biktima ti didigra.
