LAOAG CITY – Kwinestyunaran ni Sang. Panlungsod Member Jason Perera ti Department of Public Works and Highways – 1st Engineering District no apay a saan da pay nga insubmitir ti kiddaw ti konseho a listaan dagiti kumpleto nga infrastructure projects.
Segun kenni Perera, nasuroken a dua a bulan ti napalabas ngem agpapan ita ket awan pay ti inted ti ahensya a listaan dagiti proyekto kas iti Asphalt, solar lighting, canals ken dadduma pay.
Inlawlawag na a saan laeng a ti konseho ditoy ciudad ti Laoag ti agkidkiddaw iti daytoy no diket uray pay iti National Bureau of Investigation (NBI).
Inpetteng ni Perera a saan na nga ammo ti rason ti Department of Public Works and Highways – 1st Engineering District no apay a saan da met laengen a mangted ti listaan nga isu ti pagibasaran no no pudno ti dimmanon kenkuana a report nga adda ti maipagarop a ghost projects.
Kunana a saan laeng a naminsan a daras a nagkiddaw ti konseho babaen iti Sang. Panlungsod Secretary ngem agpapan ita ket awan pay daytoy.
Gapo iti daytoy, nagmosyon ni Perera nga ipangato iti Ombudsman tapno daytoy ti agtignay iti maiyannatop nga aksyon tapno agcoply ti Department of Public Works and Highways iti kidkiddawen da a listaan sipud 2022 agingga iti 2025.
