LAOAG CITY – Agtultuloy ti panangbirbiruk dagiti otoridad ti maysa a menor de edad a lalaki a nagpukaw kalpasan a timmapog iti baybay iti Barangay Calayab ditoy ciudad ti Laoag idi kalman, Oktubre 26.
Daytoy ti inbatad ni Dr.Melvin Manuel, ti mangidadaulo iti City Disaster Risk Reduction and Management Council ditoy ciudad ti Laoag.
Segun ken ni Manuel, napan nagbisbisikleta ti biktima kadwa na dagiti tallo a papagayam.
Nupay kasta, kuna ni Manuel a basar iti nakalap da nga impormasyon, idi nakadanun dagiti agpapagayam iti lugar ket bigla lattan a napan timmapog ti biktima iti baybay, ngem saanen a timmakdang ken nakita pay agpapan kadagitoy a gundaway.
Inpakaammo ni Manuel a kadwa da nga agbirbiruk iti biktima dagiti kameng ti Philippine Coastguard, Bureau of Fire Protection ken dadduma pay a maseknan nga ahensya ti gobierno no sadinno nga adda dagiti napan nagsawar iti kabaybayan iti ili ti Paoay, Currimao ken iti paset ti Barangay Gabu ditoy ciudad ti Laoag.
Mainaig iti daytoy, inbatad ni Barangay Chairwoman Marvelyn Padayao iti Barangay Calayab a sakbay ti insidente ket addan ti panagballaag na iti publiko a saan da paylaeng a mapan tumaptapog wenno agdigdigus iti baybay gapu ta nadawel.
Kabayatanna, emosyonal nga immapela ti tulong ni Miss Aldy Realo, mangay-aywan iti mapukpukaw a menor de edad para iti al-alisto a pannakabiruk iti nasao a biktima.
