LAOAG CITY – Inbatad ni Provincial Veterinarian Dr. Loida Valenzuela nga agtultuloy ti naiget a panagbantay da kadagiti border ditoy probinsia seknan panangiserrek ken panagiruar ti baboy wenno karne ti baboy.
Kuna ni Valenzuela a napagtutulagan da iti rehion dos maipanggep iti nasao a banag no sadinno plano da iti pannaka-i-banned dagiti traders a saan dumaldalan iti usto a proseso, wenno dagiti agiliblibas kadagiti baboy, ken ti karne na daytoy.
Inlawlawag na a no matiliw dagitoy ket insigida a makumpiskar dagiti baboy ken karne ti baboy, ken sabali pay ti penalty da.
Kuna ni Valenzuela, dagiti makumpiskaran ket mabalin a maidiaya kadagiti uniformed personnel, maipaay iti ospital, ken adda pay dagiti gundaway a naidiaya iti pagbaludan laketdi saan a naapektaran ti asf.
Innayon na a no asymptomatic dagiti baboy ket insigida nga ikali da tapno mailiklikan iti posible a panagwaras ti virus.
Nupay kasta, inpasigurado ni Valenzuela nga awan ti mairepreport iti kallabes maipanggep kadagiti traders a dumaldalan iti illegal.
Mangnamnama ni Valenzuela a babaen iti coordination ti umili ket saanen a maapektaran ti probinsia mainaig iti asf, rason a ginutigot na ti kakailian nga insigida agireport nu adda iti madlaw kadagiti taraken.
Kuna ni Valenzuela a dandanin iti panagbalin a yellow zone iti probinsia kas maururay laengen ti resulta ti laboratory surveillance ti ciudad ti Batac, ili ti San Nicolas, ken ditoy ciudad ti Laoag.
