LAOAG CITY – Inlawlawag ti state weather bureau a nagtalinaed a napigpigsa ti Super Typhoon Yolanda maidasig iti Bagyo Uwan nga addaan ti potensial nga agbalin a super typhoon.
Iti press briefing ti Department of Science and Technology (DOST-PAGASA), inpetteng ni Weather Services chief Engr. Juanito Galang nga iti baet a dakkel ti panagpada ti dua a bagyo nangruna iti mapaspasamak a rapid intensification, nagtalinaed a posible a saan a madanon ti Bagyo Uwan ti kinapigsa nga intunda ti Super Typhoon Yolanda.
Inladawan ti opisial ti napasamak idi Yolanda nga adda pay laeng daytoy iti ruar ti Philippine Area of Responsibility (PAR) ket nabukelen ti angin agingga a pimmigsa.
Inbatadna a napaspaspas ti nasao a bagyo maidasig iti Bagyo Uwan isu nga apaman a nag-landfall daytoy iti Visayas ket naruay nga istruktura ti nadadael.
Nupay kasta, saan nga iwalin ti weather bureau ti posibilidad a mangitunda ti Bagyo Uwan ti kapada a perdision nangruna ket agtultuloy a pumigpigsa daytoy sakbay a naan-anay nga ag-landfall.
Maipalagip a nangitunda ti nakaro nga storm surge wenno dadakkel a dalluyong ti Super Typhoon Yolanda idi dimmuprak iti Visayas a maysa kadagiti maitudtudo a rason ti pannakatay ti adu a residente.
Kuna ni Engr. Galang, mangitunda pay ti nakaro nga storm surge ti Bagyo Uwan kagiddan ti napigsa a tudo rason a nasaysayaat a nasapa nga agibakwit dagiti residente nangruna kadagiti coastal areas.
