LAOAG CITY – Dumanon iti agarup 650 a ribu dagiti kabagis wenno miembro ti Iglesia Ni Cristo (INC) ti nakikaysa iti umuna nga aldaw ti ”Transparency for a Better Democracy” rally iti Quirino Grandstand ita a rabii ti Domingo, Nobiembre 16.
Basar iti Manila Disaster Risk Reduction and Management Office, mapattapatta a dumanon iti 650 a ribu a tattao dagiti nagatendar iti lugar iti oras ti ala-6 ti rabii.
Nangrugi ti tignay protesta ita a Domingo ken naikeddeng nga agtultuloy agingga inton Martes, Nobiembre 18.
Nakasuot dagiti nakipaset ti puraw a bado nga adda ti nakasurat a “Transparency for a Better Democracy.”
Gagem ti rally a papigsaen ti panawagan para iti transparency ken naun-uneg nga imbestigasion iti maipagarup nga anomalya kadagiti flood control project a pinundoan ti trilyon a pisos a pundo ti gobierno.
Inpetteng ti Iglesia Ni Cristo ti kinapateg ti panagsungbat mainaig kadagiti adda iti likudan ti iregularidad a dagiti proyekto imprastuktura ti gobierno ken maipasubli ti aniaman a napukaw a pundo ti gobierno.
Inbatad ni Iglesia Ni Cristo spokesperson ken minister of the gospel Kapatid a ni Edwil Zabala, nakalukat ti protesta uray kadagiti saan a miembro ti Iglesia.
Kunana nga agtultuloy ti nakappia a panawaganda agingga a mapagsungbat dagiti adda iti likudan ti korapsion.
Kabayatanna, nasuspenso ti face-to-face classes idiay Manila kabayatan nga agtultuloy ti protesta.
