LAOAG CITY – Naarestar ti maysa a maibilang nga Street Level Individual babaen kadagiti otoridad iti Barangay 6, Santa Rita iti ili ti Paoay.
Ti suspek ket agtawen ti 48, naasawaan ken residente ti Barangay 11, Cabangaran iti nasao met laeng nga ili.
Segun ken ni P/Capt. Jackson Sugayen, Hepe ti Paoay Municipal Police Station, kabayatan ti panangiwayatda ti Intelligence Driving Mobile Patrolling iti national highway iti paset ti Barangay Paratong iti ili ti Paoay ket ditoy a nakitada ti maysa a lalaki a nakalugan ti motorsiklona nga adda iti igid ti kalsada.
Inbatadna nga apaman nga immasidegda iti nasao a lalaki ket kellaat a nagpataray ti suspek nga umadayo iti lugar.
Inlawlawagna a gapu iti kinapaspas ti panagpataray ti suspek ket natnag daytoy iti kataltalonan.
Kunana nga idi asitganda ti suspek ket insigida a nagtaray kagiddan ti panangipurwakna kadagiti sumagmamano a plastic sachet a naglaon ti maipagarup a shabu.
Nupay kasta, natiliw met laeng dagiti otoridad ti suspek.
Mainaig iti daytoy, nakumpiskar manipud iti suspek ti walo nga heat sealed transparent plastic sachet a naglaon ti maatap a shabu nga agdagsen ti 1.5 grams nga agbalor ti walo a ribu a pisos pakairamanan dagiti dadduma pay a drug paraphernalia.
Iti agdama, nagtalinaed iti pagbaludan ti suspek ken sumango iti kaso gapu iti panaglabsingna iti Republic Act No. 9165 wenno ti Comprehensive Dangerous Drugs Act of 2002.
