LAOAG CITY – Mangnamnama ni Dr. Rodrigo Catcatan, mangidadaulo ti City Health Office ditoy ciudad ti Laoag a mairugi agingga iti 2030 ti lokal a gobierno iti Super RHU ditoy ciudad.
Segun kenni Catcatan, daytoy ti kalikagum ti Universal Health Care a kada munisipalidad ket addaan ti Super RHU na.
Inbatad ni Catcatan a kadagitoy a gundaway ket awan pay ti makitkitada a pangipatakderan daytoy gapu ta masapol iti lote nga addaan iti minimum 1000 sq. meters a kalawana.
Mainaig iti daytoy, kunana nga adda metten ti lungalong a mabalin a pagpilyan a lugar a pangipatakderan iti daytoy kas iti bypass road iti Brgy. Camangaan wenno Brgy Talingaan.
N pay kasta, kuna na nga adda met ti suhestyun ni Mayor James Bryan Alcid a maymayat no iti paset ti central terminal wenno iti Discolandia iti Brgy. 1 tapno as-asideg ngem awan pay ti pinal a decision.
Kabayatanna, ipakaammo na nga umabot iti 15M ti pondo nga agappo iti Department of Health ken ti laeng pannakabagi ti lokal a gobierno ket ti lote a pangipatakderan na.
