LAOAG CITY – Inrakurak ni Senate President Pro Tempore Panfilo Lacson a maipagarup nga inallukoy isuna dagiti sumagmaano a retirado nga opisial ti militar nga agbalin a paset ti maysa a “civil-military junta.”
Inbatad ni Lacson a saanna nga inkankano daytoy ken saan a pulos nga immannugot iti nasao nga ideya.
Kunana a rumrummuar daytoy a singasing gapu iti pungtot ti publiko iti nalawa a korapsion pakairamanan ti maanomalya a flood control projects ti gobierno.
Nupay kasta, inpettengna a mailabsing iti Konstitusion ti aniaman nga junta, “transition council,” wenno military “reset.”
Nagpanawagan ni Lacson nga itultuloy ti panangbabalaw kadagiti maanomalya ngem saan nga isakripisio ti 1987 Constitution.
Inpettengna a nalawag iti Konstitusion ti line of succession nga agliplippas iti House Speaker isut gapuna nga inlungalongna ti Designated Survivor Bill tapno palawaen ti succession ken masigurado ti continuity of government iti oras ti nalawa a krisis.
Dinakamat ni Lacson a kontra ti Catholic Church iti aniaman a naranggas wenno extra-legal a wagas ti panangsukat ti gobierno.
