LAOAG CITY – Mamati ni Senate President Pro Tempore Panfilo Lacson a nalidem nga agbalin a witness ni dati nga Ako Bicol party list Rep. Zaldy Co iti anomalya iti flood control projects.
Daytoy ket gapu ta ikonkonsiderar ti dati a kongresista nga isuna ti “architect” iti flood control scandal.
Inbatad ni Lacson a ti maysa kadagiti requirement tapno agbalin nga state witness ket nasken a “least guilty” wenno saan a kangrunaan a nagbasol a posible a saan a masolbar ni Co.
Inlawlawagna a no awaten nga agbalin nga state witness ni Co ket naruay dagiti mairamraman.
Kunana a no adalen ti partisipasion ti dati a kongresista ket naruay ti mamati nga isuna ti arkitekto ti binilyon nga insertions.
Malaksid iti daytoy, naruay dagiti testigo iti nasao a kaso kas kada Department of Public Works and Highways Undersecretary Roberto Bernardo ken dati a District Engineer Henry Alcantara.
Iti baet daytoy, kitaen ti Senador no ania ti mapasamak apaman a makasangpet ditoy pagilian ni Co nga agdama nga adda idiay Prague, Czech Republic kalpasan a naarestar idi Huebes ti malem, oras ditoy Pilipinas.
