LAOAG CITY – Kwinestionaran ni Vice Mayor Rey Carlos Fariñas ti inpila nga ordinansa ti Barangay 16 iti konseho ditoy siudad ti Laoag.

Ti nadakamat nga ordinansa ket maipanggep iti barangay ordinance a mangmandar kadagiti residente iti Barangay 16 a mangala iti bukod da a Barangay Identification Card wenno Barangay ID.

Segun ken ni Vice Mayor Fariñas, saanen a masapul daytoy a Barangay ID gaputa adda metten ti National ID nga us-usaren iti tunggal umili a mangipakita no ania ti naggapuanan wenno Barangay da.

Kunana a ti pannakaaramid ti Barangay ID ket isu pay a nayon a paggastosan dagiti bumarangay.

Nupay kasta, naipasubli ti ordinansa iti barangay para iti ad-adda a pannakaadal ken pannakaplastarna a nasayaat.

Mainaig iti daytoy, binilin ni Fariñas ni Konsehal John Michael Fariñas, councilor iti distrito a pakairamanan iti nadakamat a barangay, nga ammoen no ania ti pakausaran ti Barangay ID iti Barangay 16 ditoy siudad.