LAOAG CITY – Inbatad dagiti uppat a dati a bodyguards ni dati nga Ako Bicol party-list Rep. Elizaldy “Zaldy” Co a nabukel ti ”18 Maleta boys” tapno mang-blackmail kontra kadagiti nalalatak a politiko ken nangangato nga opisial mainaig iti panag-deliver-da ti minaleta a kuarta.
Immunan iti daytoy, maipalagip nga imbabawi dagiti uppat manipud iti 18 a miembro ti dati a bodyguard ni Co dagiti immuna nga akusasionda kada Presidente Ferdinand Marcos Jr., Leyte Rep. Martin Romualdez ken ni Co kalpasan a naamoan a maipagarup a ti kalikagum ti grupoda ket ”mang-blackmail ken extortion” kontra kadagiti sumagmamano a nalalatak a personalidad.
Iti baro a rakurakda, inbatadda a bayat a bumaybayag ket maipagarup saan nga agsisilpo dagiti istoriada mainaig kadagiti nagan nga inagnagananda kadagiti alegasionda.
Innayon pay ti maysa kadakuada a kalikagum ti grupoda a pagpammarangen nga umawawat ti kuarta manipud ken ni Co dagiti personalidad nga innagananda.
Malaksid iti daytoy, inakusaranda pay ti abogadoda a ni Atty. Levito Baligod a nagkari ti dakkel a gatad a kuarta kadakuada no maaramidda ti planoda a mangdadael ti nagan dagiti sumagmamano a personalidad.
Mainaig iti daytoy, naiget a naglikudan ni Baligod dagiti alegasion kenkuana.
Innayon pay ti abogado a saan daytoy a nagkari ti dakkel a gatad a kuarta kasukat ti panagpirmada kadagiti affidavit-da.
Kabayatanna, inpetteng met ni George Villalon, maysa kadagiti dati a bodyguard a saan nga immatras iti immuna nga alegasionna a segun kenkuana, umno dagiti immuna nga alegasionda.
Inpanagetgetna a dagiti uppat a testigo a nangibabawi ti affidavit-da ket maipagarup naiyawatan dagitoy ti P20 million agingga P25 million ti tunggal maysa kadakuada kasukat ti panangibabawida kadagiti testimoniada.
Malaksid iti daytoy, inbatadna nga iyawatanda koma pay isuna ti kuarta ngem saanna nga inawat daytoy.
