LAOAG CITY – Pinilaan ti Ombudsman ti agsusukot a kaso da Uswag Ilonggo Representative Jojo Ang Jr., dati nga Ako Bicol Representative Zaldy Co, negosyante a ni Alonso Tan ken dagiti opisial ti Sunwest Inc., International Builders Corp., J.E. Tico Construction Company, Allencon Development Corp., ken A.M. Oreta & Company.
Ti lima nga agsusukot a reklamo ket inpila ti Amlig Antique Alliance, maysa a koalision dagiti environmental advocate, mainaig iti maipagarup anomalia dagiti proyekto a nangitunda ti pannakadadael ti aglawlaw ti Antique.
Malaksid kadakuada, naipilaan pay ti reklamo dagiti dati ken manarimaan nga opisial ti Department of Public Works and Highways (DPWH) Region VI, DPWH Antique District Engineering Office ken Department of Environment and Natural Resources–Environmental Management Bureau Region VI.
Basar iti Amlig Antique Alliance, dagiti proyekto a naipatungpal manipud iti tawen 2019 agingga idi naudi a tawen ket maipagarup naglabsing iti environmental laws ken procurement laws.
Mainaig iti daytoy, sinuportaran ti Kiahublagan Kontra Kurapsyon (KKK) ken dagiti dadduma pay nga advocate iti Panay ti nadakamat a panangipila ti reklamo.
Maipalagip nga immunan nga inbatad ni Ramil Martinez, communications coordinator ti Amlig Antique Alliance,a nangitunda ti dakkel a pannakadadael iti aglawlaw ti nagsasaruno a proyekto ti Sunwest Inc. nga indauloan ni Zaldy Co.
