LAOAG CITY – Nagulimek ti apag-biit dagiti opisial ti Hong Kong iti panangrugi ti tallo nga aldaw a panawen ti panagladingit tapno lagipen dagiti pimmusay kalpasan ti maibilang a kadakkelan nga uram iti uneg ti 80 a tawen.
Natay ti 128 nga indibidual gapu iti insidente idinto nga adda ti 79 ti nasugatan ken dinosdosena ti nagtalinaed a saan pay a nairaman iti bilang.
Naarestar ti walo nga indibidual gapu iti maipagarup a maanomalya iti pannakaipatungpal ti renovation ti pasdek idinto a tallo a dadduma pay ti naibalud gapu iti kaso a manslaughter.
Naisayangkat ti maysa a seremonia iti ruar ti government headquarters a nakita a nagatendar ti city leader a ni John Lee pakairamanan dagiti dadduma pay nga opisial ti Hong Kong para iti pannakaobserbar ti tallo a minuto a panagulimek.
Naikabil iti half mast ti bandera ti China ken Hong Kong kas panangipakita ti panagladingit kadagiti biktima ti dakkel nga uram.
Mainaig iti daytoy, basar iti imbestigasion dagiti otoridad, apaman a nangrugi ti uram ket alisto a nagramram ti apoy kadagiti pito manipud iti walo a towers iti Wang Fuk Court iti northerly suburban Tai Po district ti Hong Kong.
Dimmanon ti sumurok dua a ribu a bumbero ti nagtitinnulong a nangsebseb ti apoy iti agarup dua nga aldaw sakbay a naideklarar nga under control ti uram.
Iti agdama, saan pay a masinunuo dagiti otoridad no ania ti namunganayan ti uram.
Kabayatanna, basar iti 2021 government census, naipasdek ti housing estate idi 1983 nga addaan ti 1,984 nga apartments para iti agarup 4,600 a residente.
