LAOAG CITY – Nagpanawagan ti maysa nga agpanpanday linteg iti suporta para iti nailungalong a pannakaipaay ti P2,000 a binolan nga allowance iti amin a persons with disabilities (PWDs), aniaman ti employment status da.
Segun ken ni Quezon City 5th District Rep. Patrick Michael Vargas, inpila na ti House Bill (HB) No. 3770, wenno ti proposed Disability Support Allowance for Persons with Disabilities Act, tapno ad-adda pay a mapapigsa ti suporta kadagiti addaan ti rangkap ti bagina ket masolbar ti nabayagen nga socioeconomic barriers a sangsangwen da.
Iti kanito a mapagbalin a naan-anay a linteg ti gakat, mabukel ti Disability Support Allowance Program, maysa nga universal P2,000 monthly assistance para kadagiti persons with disabilities.
Ti nasao a kantidad ket mai-index iti inflation tapno mapagtalinaed ti epekto na iti panagbiag ken partisipasyon dagiti persons with disabilities iti kagimongan.
Segun ken ni Vargas, masansan a makapasar ti kinarigat dagiti persons with disabilities no ikompara iti kaadoan a populasyon isut gapuna a rumbeng a tulungan dagitoy ti gobyerno.
Iti Section 5 ti bill, ti Department of Social Welfare and Development (DSWD) ti kangrunaan a mangipatungpal ti programa, idinto a katulungan na ti National Council on Disability Affairs, Department of the Interior and Local Government, Department of Health, Philippine Statistics Authority, local government units, PWD organizations, ken dadduma pay a relevant stakeholders iti panang-develop ti sistema.
Amin a persons with disabilities nga addaan ti valid disability ID ket makaawat ti allowance, uray aniaman pay ti mapaspastrek ken klase ti trabaho da.
Saan da pay a madiskwalipika uray agaw-awat da ti dadduma a benepisyo kas ti Pantawid Pamilyang Pilipino Program wenno diskwento kas ti senior citizen benefits.
Gagem ti nasao a gakat ket tapno masigurado nga awan ti persons with disabilities a mabati no maipapan iti tulong-pinansyal ken social protection ti gobierno.
