LAOAG CITY – Inpanakkel ti kamara de representantes a ti sektor ti edukasyon ti addaan ti kadakkelan a pondo iti 2026 national budget a nairekord iti pakasaritaan ti Pilipinas.
Naiyalokar ti House version ti 2026 General Appropriations Bill ti kadakkelan a pondo para iti edukasyon nga umabot iti ₱1.28 trilyon wenno 4.1 porsiyento ti Gross Domestic Product (GDP).
Daytoy ti inrakurak ni House Appropriations Chairperson Rep. Mikaela Angela Suansing.
Inbatad ni Suansing a nagnayun ti Kamara de representantes ti ₱56.6 bilyon para iti sektor ti edukasyon, nga umuna a gundaway a naglabes iti 4 a porsiyento iti international benchmark para iti education spending.
Dakkel a paset ti nainayun iti pondo ti nailatang iti Basic Education Facilities Program nga umabot iti ₱63.2 bilyon ken manamnama a mausar iti panagpaaramid ken pagpatarimaan ti sumuruk-kumurang a 25,200 classrooms intono 2026.
Pinondoan pay ti Kamara de representntes ti Universal Access to Quality Tertiary Education (UAQTE) program a mangsupusop iti ₱12.3 bilyon a pagkurkurangan ti 114 state universities and colleges iti umuna a gundaway sipud idi 2017.
Umabot met iti ₱52.2 bilyon ti pakabuklan a pondo para iti Universal Access to Quality Tertiary Education ken dadduma pay nga scholarship ken training programs, a pakairanudan ti agarop 2.49 milyon nga agad-adal iti intero a pagilian intono 2026.
Basar iti Kamara de representantes, paset daytoy ti ad-adda pay a napalawa a reporma iti budget tapno masigurado a ti 2026 budget ket maipatungpal na dagiti prayoridad iti pagilian a mangitunda ti konkreto a benepisyo kadagiti pamilya a Pilipino.
