LAOAG CITY – Dead on arrival in maysa a lalaki kalpasan ti pannakadesgrasya na iti paset ti Brgy. 11 Catagtaguen, Banna Ilocos Norte.
Ti biktima ket agtawen ti 28, awanan ti asawa ken residente iti Brgy. Daquioag iti ili ti Marcos.
Basar iti Philippine National Police iti ili ti Banna, nakalugan ti biktima ti motorsiklo ken agpalaud ngem idi nadanon na ti kurbaan a paset ti kalsada ket napukawan ti kontrol iti manibela a nangitunda iti pannakaitupar na iti puon ti kaya nga adda iti igid ti kalsada.
Gapo iti pasamak, nagsagaba ti sugat ti biktima iti nagduduma a paset ti bagi na ken dagus a naitaray iti Rural Health Unit iti ili ti Banna ngem naideklara a dead on arrival.
