Nagballigi ti pannakaipatungpal ti maikadwa a bansada ti pannakabakuna dagiti ubbing nga agtawen ti 9 agingga iti 14 iti Human Papilloma Virus (HPV) vaccine iti ili ti Banna.
Gagem ti pannakabakuna dagiti ubbing iti Human Papilloma Virus (HPV) vaccine ket tapno maliklikan ti nagduduma ti klase na a cancer.
Naamoan a ti ili ti Banna ti kaunaan nga ili iti probinsya a nakagun-od iti 90 a porsiento a panagbakuna kontra iti nasao a sakit.
Mainaig iti daytoy, naamoan a saan laengen a dagiti babbai ti mabalin a bakunaan iti daytoy no di ket uray kadagiti lallaki gapu ta mabalin da met a makaptan ti nasao a sakit.
Kabayatanna, inbatad ni Mayor Mary Chrislyn Abadilla iti ili ti Banna a ti pannakasalwad ti salun-at dagiti ubbing ket saan laeng a responsibilidad dagiti nagannak wenno dagiti health workers no di ket ti sibubukel a komunidad.
Innayon na a responsibilidad ti amin a salwadan ken bantayan ti salun-at ken masakbayan dagiti umili.
Inpaganeget met ni Dr. Marizon Dumlao iti Department of Education – Central Office ti kinapateg ti pannakasalwad ti salun-at dagiti ubbing.
