Kalikagom dagiti prosecutor nga ad-adda pay a mapaalisto ti pannakaipakita iti International Criminal Court dagiti testimonya ti tallo a testigo tapno mapaneknekan dagiti alegasyon da kontra ken ni dati Presidente Rodrigo Duterte mainaig iti anti-illegal drug campaign na.
Iti inparuk-at a filing date idi Oktubre 30 ni Acting Prosecutor Mame Mandiaye Niang, kiniddaw ti prosecution nga usaren ti testimonya ti tallo a testigo tapno mapaalisto ti panangusig iti kaso ni Duterte.
Nailawlawag iti dokumento nga insumitir ti prosecution no ania ti possible a maitulong ti tunggal maysa iti tallo a testigo iti kaso ni dati a Presidente Rodrigo Duterte iti International Criminal Court (ICC).
Karaman met kadagiti impormasyon iti testimonya nga ipaay ti kada testigo ket dagiti naulit-ulit a pattern wenno wagas ti panagpatay a maikonkonektar kadagiti operasyon ti Philippine National Police (PNP), no kasanu a naisayangkat dagiti operasyon ti nailian a pulisya, no kasanu a nagbaliw dagiti operasyon iti panagtulid ti panawen ken dagiti partikular nga insidente ti pammapatay a karaman kadagiti kaso a naipila.
Iti maudi a paset ti dokumento ket kiniddaw ti prosecution iti korte ti ICC nga aprubaran ti kiddaw da iti panangusar ti testimonya ti tallo a testigo iti kaso ni Duterte.
